Mir Giele vo Bümpliz

Über lausige Buvetten-Hot-Dogs und muffige Garderoben

von

Manuskript von und zu Bümpliz
von Anders Anders

Unter dieser Rubrik schreibt das Bümplizer Urgestein Anders Anders in regelmässig unregelmässigen Abständen Liebesgeschichten an seine Wiege- und Windelstätte. Beruhend auf nebulösen Erinnerungen und durchtränkter Fiktion zollt er Orten, Figuren und Lebensarten des gemeinen Bümplizers gebührenden Tribut.

Mir Giele vo Bümpliz chöi äbe no schutte! Mir hei scho gschuttet, wo die ds Ostermundige no nid emau hei chönne uf em Häfi sitze. Scho aus Windleschiisser si mir zwüsche de Blocks dr Baue nachegstogglet.

Nach dr Schueu ume heigrennt, dr Schueusack, vor dr Mèèr ihrer Nase i Egge knaut- u ab uf e Bitz! „Hesch d Ufzgi gmacht?“, het das Echo vo ihrer Stimm aube no schrill im Liftschacht ghauet. Aber scho bim erste Kick isch de scho aues- diretissima Göschene-Airolo- furt blase gsi! Kügelet, pässlet, dribblet u gloppt, ginget, ghäbt, zoge u ghacket bis es het gfiischteret u mir nüm hei gseh, weli Fige jetz wär isch.

U dr Henni, das Füdlegsicht, mit sim fette Rasemäiher? Immer öppis ds wauschte gha, dä Gigu, u üs ging au Gottschand gseit!

Weisch no dä Siech het üs de aube griffig a de Grännihäärli zoge! U wenn er sini Rasesprützaalag het ufbout u ihre het küderlet - natürlech immer i de Summerferie– de heimer de aube ufe Schueuhuusplatz müesse.

U dert si de ging scho die i Aafüehrigs- u Schlusszeiche «Grosse» druf gsi: d Fluumhaar-Possi.

Hei eifach iri Striche u Pfifene uf ds Goal pfäfferet, um bi de Batik-T-Shirt-Meitschis Schriis ds ha.

Scho so, aber dr eint oder dr anger vo üs hättis, wenn o nid ids Panini-Büechli, so ömu zmingscht id Nati A gschafft- oder wie heisst die Gurkeliga afe ömu o?

Äuä Biontech, Moderna oder Johnson&Johnson- League? Dr Totomat wird Ihne präsentiert vo Roche Corona Selbsttest.

Tja, wenn nid di Wybergschichte u süsch no viu Schiissi wäre dr zwüsche cho, wäre nid so viu uf e Latz gheit u würde itz wie Alängu eine uf Züri-Sangalle-Schnurri mache. A däm Pult isch de dr Alää Sutter ghocket!- läck du mir, dä Satz vom aute Fischer het mir so öppis vo gnüegelet!

Iu, hör mer uf! Du- u de dr Lücu?

Mou dä Cheib het Übersicht gha, suber dirigiert die Manne! Es Zuckerpässli hie u e Tödleche da! Aber nei, wenns chaut isch gsi oder het gschiffet, de hesch ne chönne rouke. Typisch itauiänische Schönwetterfuessbauer! Einisch e chli umsäble oder grätsche u de het er e Mougere gschrisse u ke Stifu me vor e anger bracht. Ou, u de dr Hämpu, die Kampfsou, isch dä nid no bim FC Basu gsi?

Wou, het aber haut glich no a jedi Hundsverlochete müesse, das mas de haut uf däm Niveau nüm lide. U wo ner du mau im Eis isch ir 89 Minute igwächselt worde, het er überutteret u e Gegner abegmieschet. Nume wöu dä het gseit mit emene söttige Zingge ir Fritöse stöng er de jedesmau im Offside.

U de dr Schämpu?

Ou fahr mer us mit däm Gstabi- dä isch itz für d Füchs gsi- e fertige Muttestüpfer das!

Jääh? Du, dä Paiass het de glich no ne es rächts Palmarès gha. Het ne uf au Fäu irgendwie ging no über d Linie gmurkset. U siner Penauty, die si obe use gsi! Spitzgagu id Mitti! Het ömu ging ghäscheret!

Wemer scho dran si, was isch eigentlich bi dir bachab, hesch doch o ging topfet?

Du weisch, ha eifach d Schnurre vou gha, Samstig für Samstig uf dene regionale Schuttplätz ume ds hange, vo dene luusige Buvette-Hot-Dogs, däm Dulix-Gschmack u dene iigseifte, bambelende Schnäbis i dr muffige Garderobe!

Eh ja, isch ou nüm wie früecher, gäu! Lueg doch dä Fuessbau vo hüt mau a: Aues nume no Maschinene, jede e huere Prügu, aber ustuschbar, es Nummero, macht jede si Büetz- u fertig. Hei au dr glich Stiiu, aui di glichi Irokese-Friise u lö au dr glich Stuss nach em Mätch use! Git chum eine meh mit Egge u Kante – isch jede e bidere Schwiegermuetertroum. Früecher hets no Charaktergringe gä: Weisch no die Liberos, di si ging ganz kurlegi Mürgle gsi! Wie dr Tinu Weber anno dazumau…

Nei los, über YB rede mir itz hüt mau nid, gäu.

Du bisch o ne glungnige Chutz du! Mängisch hani ds Gfüeu du truurisch de vergangene, erfouglose Zyte richtig nache. Du würdsch doch am liebschte no uf em herte Houzbänkli im aute Wankdorf sitze u über ds trischte Spiu futtere.

Äuä, die choge Zyte chöi mer gstohle blibe. Dä ganz Verein u siner Fans si dennzumau ja eigentlech e schwer depressivi Säubsthiufegruppe gsi. E Sadomasosekte, wo sech jedes Wuchenend säuber het gritzt. Nüt isch- hättsch mi ir legendäre Meischternacht söue gseh! Umezoge wie nes jungs Rehli u die ganz Nacht i de Arme vo wiudfremde Lüt gläge. Da bechumi no immer füechti Öigli, du.

Iu, die Spiu vor der Glotze u ohni Zueschouer si haut scho e Seich. Das Gmög vo de Spiler während em Spiu macht mi aube richtig stifusinnig.

Ou los, d Vrone chunt hei- de zisch ig mau ab!

Nei, Stifu, blib doch no - mir zwitschere no eis, chum!

Ne, nei, los Küse, isch guet gäu! Tschou Vrone, bi grad uf em Sprung!

U dir immer no am liire? Küse, du würdsch di o lieber mau um di Sohn kümmere statt hie ume ds pflaschte!

Wieso, was- was isch mit mim Sohn?

Äbe- das meini!

Chum Schätzu, nimmsch no es Teeli gäu?

Du bringsch mi zum Haarölseiche!

Was het er de ömu o wieder boosget?

Du geisch ne de das mau uf dr Tschuggerei ga abhole!

Auso am Cupfinau chaner ja nid si- «Mir» si ja usgschide. Aber früecher hets de da aube schön chönne chlepfe u eis hinger d Ohre gä, gäu Stifu.

Guet vor em Match heimer enang de ging no Guet-Mätch gwünscht u eis zäme gno! Brätschet u brieschet isch ersch nach em Spiu worde.

Statt drü Securitasbäpple wie im aute Wankdorf hets hüt aber ou es viu Dotze Schmierlätz, da chas di scho preiche, gäu.

Geits i öine Flöigehirni eigentlich ging nume um das Gliche: Fuessbau u …

Heiterefahne- de säg doch, wo isch er wieder am umfüdle?

Es git im Lebe no angers, Kusi: Er isch ar Klimademo: Sitzstreik uf em Bäreplatz!

Klimademo auf dem Bundesplatz

News - 30.04.2021 - Giele vo Bümpliz chöi kicke

Zurück

Deine Meinung interessiert uns! Schreibe deinen Kommentar

Verbleibende Zeichen 350 (von 350)

Kommentare von User für User

30.04.2021 | Svenä
Im Chlefu-Ost hinger uss heimer aube stundelang kicket zwüsche de Blöck. Bis d'Müettere hei use gmööget mir söue sofort hei seckle. Schöni Zyte gsi.