Brige L. - 50i im Sternen Bümpliz

Von Meerschweinchen und verbannten Pokalen

von

Manuskript von und zu Bümpliz
von Anders Anders

Unter dieser Rubrik schreibt das Bümplizer Urgestein Anders Anders in regelmässig unregelmässigen Abständen Liebesgeschichten an seine Wiege- und Windelstätte. Beruhend auf nebulösen Erinnerungen und durchtränkter Fiktion zollt er Orten, Figuren und Lebensarten des gemeinen Bümplizers gebührenden Tribut.

Erster Akt

Mäge, scho ghört dr Sterne het wieder offe und d Brige L. wott zum 50igste uf e Putz houe.

Iu, ds Buschtelefon het scho gschäuet, Säschu.

Kes Wunder isch dr aut Pächter vor d Hüng.

Dr Dragan het itz jede glingget u ds Bier ging es Mü unger em Strich usgschänkt, dä Giitsknäpper!

Zum Glück het dr neu Wirt dem Cheib e Schutt ids Füdle gä.

Ach, dä het säuber härepänglet! Bisch scho mau ga iichere dert? Würdsch e Schnurre mache, wie ne klepfte Aff!

Nei, bi no nie ds Visite.

Sträut di grad hingere! Gopfertelli, i säge dr! Dä hätti o ne Französische gmacht, wie Drägu. Dr Sterne heisst ja itz Las Vegas. Wett inechunnsch stöh da zwar no die urchige Houztische, wie immer, aber d Heidle treit nüm ihres bidere Serviertocherkostüm, sondern het itz verwäscheni Jeans mit Löcher u es knapps Glitzer-Mini an.

Nein, sag säuber.

Mo-mou, d Pokale vom Schützeverein hei si i Chäuer verbannt, derfür hei si billigi Farbkopie vom Gränd Känien, dr Celin Dion u dene affige Zouberer ufghänkt- säg ume- Siegfrid u Roy. Item u steu dr vor, wett uf ds Hüsli wotsch, de muesch di zersch amene Batzegrab, emene Tutti-Frutti-Geldspieloutomat, verbidrücke. Das isch scho mau d Schlinge füre Münze-Mani.

Die meine bigoscht mir hei dr Geldschiiser. Aber, chunsch de ou eine cho schnappe zur Brige, he? Git sicher ou öppis chlises ds schnabuliere. U d` Heidle im Churze isch sicher ou nid grad leid?

Wer chunnt de aues cho kondoliere?

Ja, aui haut, wie immer u geng, die gliiche verdächtige Schluckspechte!

Mäge sitzt im Raucherstübli vom Sternen Bümpliz

Zweiter Akt

Szenenwächsu: Morge am eis, Sterne Bümpliz …eh Las Vegas.

Brige L. sitzt elei vor emene Poster tummelnd, tänzelnder Varieté-Damene mit prallem Decolleté und chramt i ihrem Portmonee ume:

«Chani zahle, Heidle?»

Es scheppert ir Chuchi, da steit e Typ imene discofabige T-Shirt am Türrahme, putzt sech d Häng am Chuchischurz ab: «Nei d Heidle het Fyrabe. Ha se hei gschickt. Het dr ganz Abe biischtet wie ne Grosle. Eh.. aber…säg säuber: Brische? Brische, bischs du?»

«Wart jetz- Miggu? Was machsch de du da? Ha di gar nid gesh bis jetzt?»

«Iu, ha o müesse ir Chuchi ushäufe. Die Las Vegan`s Burger si glofe wiene more!»

«Cheibe Schiggeria afa hie! De heimer dä neu Verputz äuä dir ds verdanke? Was machsch de du itz im Beizewäse?»

«Umschuelig- si hei üs gseit, dass mir Pösteler e usstärbendi Gattig sige. Scho gli würde mir ersetzt dür vououtomatischi Roboter u Drohne- nume no e Frag vor Zyt. U de gfauts dr hie?»

«Eher übu hübsch, Miggu. Da vermissi dr müffelig Sterne fei e chli»

«Brische, immer no ds gliche Räf! Cha nie uf ds Mu hocke. Aber hesch wöue zahle, gäu? Eh wo isch di füechtfröhlechi Geburigsellschaft häre?»

«Die ha ig heigschickt! Isch immer ds gliche mit dene Laggine! Zersch chöme grosskotzti Sprüch, när vö si sech afa ufzieh u am Schluss bäue si sech a u schlö sech fasch Gringe i»

«Wege?»

«Wege auergattig blödem Gliir, haut! Weiss doch ou nüm! Haut gomme touschur wer, was, wie u wenn hätti besser söue mache i sim Läbe. Wer, was, wie und wenn nid het uf d Reihe becho- settige Züg. När schiesst sech d Rundi uf eine i u dä muess de dr ganz Abe ungerdüre. Dr Mäge hets preicht hinech. Si hei ihm vorgha, dass er nid mit dr Zyt göngi u di neue Medie nid nützi. Sis Büecherantiquariat sig drum am dahersüüche. Eh was söus, ma se ja glich guet die Krisene! Sogar no es Gschenk becho vo aune, isch das nid härzig! Es huere grusigs Chötteli, die Tubbelis!»

«Brische, weisch no – früecher? Ha um di buuhlet, aber hami när mit dr Säne vo Niederwange müesse ds fride gä. Het aber nid lang ghäbt»

«Die louft itz immer mit sore Anabolikamaschine ume.»

«Isch eh e huere Nebuchräie, die»

«We du nid aupot hätsch agglütet oder vor dr Hustür wärsch gstange, hätsch di villech interessant gmacht, du Löu!»

«Wer chunnt de da no drus? Verehrt weisi werde, aber wes de eine macht, schiints ou nid recht- Wiiber haut!»

«Im Nachhinein miechi mängs angers. Eh ja- es isch wies isch!»

Dritter Akt

Und so nimmt dr Abe si Louf.

«Näme mir no eis?»

«Ou muess de no d Tische abputze»

«Was Brösmeli uf Chleid?»

«Du bisch immer no ds gliche Huehn du!»

«Muesch no ds Liecht dimme weg dr Sittepolizei!»

«Verzeu lieber no chli vo früecher.»

«Verzeu lieber no chli vo dir.»

«Säg, aber du hesch o tou ghübschet mit 50gi!»

«Stöh dr guet die graue Haar mit Schwuchtleshirt!»

«Frechi Täsche, has doch gseit!»

«Wosch miner Meersäuli cho luege?»

«Ou ja, Meersäuli ghöre zu mini Lieblingstheme!»

«Blas d Cherze us, mir gö!»

«Aber los itz, Miggu, muesch de nid meine du sigsch amächelig gäu!»

«Itz isch grad es Ufo verbi glfoge!»

«Oder dr Engu zu Bethlehem?»

«Lue! Dert torklet ja no dr Mäge, Säschu u die angere Giele.»

«Chum mir gö über e Pouseplatz, süsch gseh si üs no.»

«Wo isch itz dä blöd Schlüssu ume?»

«Handtäsche vo Froue!»

«Ha gar nid gwüsst, dass du so starch bisch!»

«I welem Stock wonsch Brischitte, ma di bau nüm ghäbe!»

«E Kawalier auter Schule- treit d Frou über d Husschweue!»

«Muesch morn büggle?»

«Isch doch Coiffeuresunntig!»

«Bingo, ha morn Ruehetag.»

*Dr Sterne vo Bümpliz heisst zum Glück nid Las Vegas u dr Wirt heisst o nid Miggu. Vegan Burger gits dert o nid würklech, derfür bechunnt me es feins Tartar serviert, aber nid vor Heidle, he.

Wie gefällt dir dieser Beitrag?

News - 12.02.2021 - Brige L. - 50i im Sternen Bümpliz

Zurück

Deine Meinung interessiert uns! Schreibe deinen Kommentar

Verbleibende Zeichen 350 (von 350)

Kommentare von User für User

12.02.2021 | Steffu
Suberi Sach, wir brauchen mehr davon. PS: dä Mäge het ja ä rieese Schriiis (u hoffentlech tuet dr Stärne Bümpliz gli wider uuf).