Chäschpu u Moser

Manuskript von und zu Bümpliz
von Anders Anders

Unter dieser Rubrik schreibt das Bümplizer Urgestein Anders Anders in regelmässig unregelmässigen Abständen Liebesgeschichten an seine Wiege- und Windelstätte. Beruhend auf nebulösen Erinnerungen und durchtränkter Fiktion zollt er Orten, Figuren und Lebensarten des gemeinen Bümplizers gebührenden Tribut.

«Dr Chäschpu het e Moser- e waschechte, originau Moser!»

«Was dr Chäschpu het e Moser? Dä mit sim Ranze? Wo au Abe bis i di letschti Rundi (und no eini drüber) blibt hange- het es Moser? Dä het me doch no nie uf emene Drahtesu gseh hocke- gschwige de uf emene Renner - u scho gar nid uf emene Moser!»

«Ja, wenn igs doch säge…»

«Fahr mer us mit emene Moser! Dä würd doch nume id Pedau drücke zum hurti d Kurve ds mache: wenn ihn dr Wale wett am Chrage packe, wöu er wieder einisch nid het wöue-chönne-zahle. Dä würd sech doch nume abstrample, wenn er wiedermau dermasse hät Lämpe gmacht, dass me ihm d Schmier hät müesse uf e Haus schicke. Das chunnt eim ja vor, wie wenn dr Papscht, statt i sim Mobiu, uf emene Esu würd rite. Aber säg säuber: E Moser, vo däm Velohändler Moser ds Bümpliz?»

«Genau so eine! E schöne, aute Moser: rot metalisee, d Schautig no dunge u no mit Collets! Iiu, das si de no Velos gsi! Die Cheibe bringsch nid ds Bode! Muesch ne nume ab und zue chli chüderle, e chli d Chetti fette u, wuala, scho fahrt er wie gschmiert, so ne Moser. E gäu, da het üsereim fasch ds Gfüeuh, da muess me gar nümm trampe: Louft vone lei sone Moser, louft vone lei!».

«Du, itz mau süferli-süferli, Habasch, ke Seich, nimmsch mi uf e Arm? Vo wo het de dä e Moser u vo wo wosch de du das aues wüsse?»

«E vom Schaller däich, däm Plagöri. Am Chäschpu isch drum langsam sis Bido uf e Sack, dä het afa pischtet u kürmet wie ne auti Dampflocki, wenn er d Stäge uf isch ids Fumoir. U wo ihm einisch dr Stueu isch zämekrutet, weisch, hingeusse im Höfli, da het er gemeint itz sig auso gnue Heu dunge! We das so witergängi ligi er no ender hüt aus morn näbem Pesche. Wobii er eigentlech wöui iigäscheret wärde. Aber er sigi ja schliesslich ersch achtefüfzgi u wener e guete Tag heigi chönnis si, dass ihm no die jüngschte, buchfreie Häslis nacheöigere. Da het dr Schaller ufpruschtet. Dä Cheib cha ja zimli mulaffne, wes muess si u het gseit: das wöu er ja de no geseh, dass hübschi Bibene sech wäge ihm würde ihri gschminkte Chöpfli verdräihe, dass sig ja no dr bescht. Früecher villech, wo er no ke Schnouz heig gha u derfür e besser pouschtereti Biire. Aber er söu sech doch am Morge mau wage i Spiegu ds luege, das wäri ächt Ziviu Curasch. Es sig scho klar, dass Wahrheit weh tüeg, aber er sig doch weiss Gott aues andere aus e Don Quischott. Dr Chäschpu het drufabe e Mouggere gschrisse. Het sini Stange afa hypnotisiere u ke Schnurre me abenang ta. Mir hei natürlech die Suppe wieder müesse uslöffle u am Schaller gseit, er sig doch e Pralaaggi u söu de hankerum mau versueche si Boiler am Füdle ines ganzes Spiegubiuds bringe.»

«Tüecht mi ou! U de, wiiter?»

«U drufabe het dr Chäschpu zmingscht wieder uf de Stockzähn glächlet u dr Schaller dä het du dr Guetmönsch useghäkt. Er, dr Chäschpu söu doch ums himmusgottswiue öppis für d Linie mache, de sig er ou nüm so grantig. Me merki richtig, dass er nid im Ideaugwicht sigi, das schlöngi nämlech uf ds Gmüet. Süsch wär er ja ou nid derewäh difisiu. Er, dr Schaller, sig aber mit sim Füdle im Reine. Schliesslech ermüglechi ihm das e Komfort bi eire vo sine liebschte Tätigkeite, em sitze- e bezüglech Läbesqualität nid ds ungerschätzende Faktor. Es sig ja offesichtlech, dass er ou am meischte Sitzläder heigi ir Beiz.»

«Schnurrihung, das! U när, chum verzeu!»

«Da hei du aui zäme wieder glachet u d Stimmig isch grad e angeri gsi. Er würdi ja schampar gern wieder e chli Velo fahre, het du dr Chäschpu gmeint. Aber es sig im dermasse ds wider i sones Velogschäft ds ga, dass chönni mir üs aui gar nid vorsteue. Für ihn sig das schlimmer aus zum Cuafför ds gha u sech über irgendwelchi Wetterprognose ds ungerhaute. Eh ja, wenn er i somene Velolade stöngi, de bechämi er ächt Fläre im Hemli unger de Arme. Für was er de das Velo gedäichi ds bruuche? Ob er e Schibebräms wöui oder e Nabeschautig? Ja, das sig hüt fasch Pflicht u nei, er gsuuch ihn weniger uf somene Mountäinbike mit Federig. Ob er sech da nid tüschi, aber er bruchi ds Velo doch ender aus Vehiku für vo A nach B u nid aus Sportgrät - luuter so Sache! Das löschi ihm aube richtig ab das Gliir vo dene Verchöufer. Derbi chönn er doch nume säge weli Farb ihm no gfaui u ob das Gfährt billig, tüür oder soumässig überrisse vom Priis här sigi. U am Schluss chouf er de aube eifach das, wo me ihm sägi. Ganz egau ob er es bruchi oder nid! Er heig aube bigoscht säuber ds Gfüeuh, die wüssi besser, was er würklech bruchi - die kenni ihn besser, aus er sech säuber kenni! Ids augemeine Gepruschte u Schenkuchlopfe seit du dr Schaller, er dr Chäschpu, chönn ja um die troumatischi Situation ds vermiide statt i Handu zu ihm i Chäller cho, dört stöngi no e Renner, füfzähjährig, aber es Bischuu!»

«Das het dr zääimäuchig Schaller gschwaflet?»

«Mir hei üsne Ohre ou fasch nid trout. Für ne Huni chönn er ne ha. Aber ds Sattutäschli mit em Werkzüg drin, daderfür müess er ihm no zuesätzlech füf Stei höische. Item, womer du hei usegfunge, dass sechs bi dem Bischuu umne Moser handelt, da heimer em Chäschpu gseit das sig gwüss es Schnäppli!»

«Ja u itz, roschtet dä Chlapf eifach i Chäschpus Chäuer statt i Schallers?»

«Das hani zersch ou dänkt, bi däm Plöischler, aber nüt isch. Dr Chäschpu isch tatsächlech scho am Tag druf ume Wohlesee gfahre.»

«Das gloubsch ja säuber nid, dä isch doch sicher nume ume Block i nächscht Schpunte?»

«Nei nüt, dr Tinu vom Tscharnerguet het ne ar Bouschteu ds Hingerchappele gesh verbichiiche wo er «on tuur» isch gsi.»

«Ja ds Hingerchappele hesch ja ou regumässig es Poschi!»

«Nei du, i gloubs dä Cheib meints würklech ärnscht, dä wotts nomau wüsse! Er heig zwar scho chli leer gschlückt, wo er aube sig vo hinge gno worde u eigentlech gmeint heig gha, er heig schon finechli e Zagge druff. Einisch hätt er dä Göppu am liebschte fasch im Wohlesse versenkt, wo ihn e aute Sack links heig la liige u ihm ds Gfüeuh heig gä, er heig e Stock im Arsch. Zum Glück heiger du no gesh, dass es sech bi däm Täill am Rahme nid umene Defibrillator, sondern e Elektromotor ghandelt heig. Itz lueg er ging grad zersch, ob die Träwle wo ihn überhole, bschiise u glich derzue Figene mache aus wäre si dr Länce Armstrong persönlech. Da flüg er itze nüm druf ine. Aber, d Rennvelofahrer sige süsch äbe es richtigs verschwornigs Vöukli! U är ghöri itz ou derzue. Da grüessi jede enang bim verbiifahre. Natürlech nume d Renner d Renner! So ne Biker sig de nid öppe ds gliiche, dä ghöri nid zum gliche Schlag. U jede schpienzli bim chrütze uf si Rahme u nicki anerkennend, wenn er dr Moser Schriftzug gsächi. U sit er sech im Ottos Wareposchte, weisch, ds Bethlehem hinge, no so nes neongäubs Radlershört kouft heigi u engi Radlerhösli derzue, weisch, die wo eim dr Püntu fasch verdrücke, macher auso e sou suveräne Iidruck!»

«Ja klar, u d Scheiche rasiert er sech o no, oder was?»

«Nid dass i wüsst, aber itz mach er ömu scho dr Längeberg, ohni dass er am Abe völlig chnüttu sig u brittlet wie nes Schiit. Wenn er de aube i eine vo dene Landgasthöf i dr Gartebeiz höckli -zum Moscht tanke, natürlich- u sis Velo ane Chegeleboum steui, de chöm er sech vor wie dr Scheich vo Abu Dhabi: E Moser, he? Eh auso, isch das nid no e Moser! Lue mau dä Moser u momou e Moser, sägi de Lüt aube. U nid säute versammli sech mängisch e chlini Mönschetrube rund um sis Zwöirad u fachsimpli u lamentieri. U är nämi de aube e Schluck vo sim Panasch u luegi zfride uf si Ranze, wo scho tou gmingeret heig!»

* Moser- Velorähme gö uf e Hans-Ueli Moser, eine vo de bedütenste Velo-Constructeure us dr Schwiz zwüsche de 70er u 90er Jahr zrugg. Er het eigeni Rähme entwicklet, die vom italienische Rahmebouer, Renato Negri, glötet u gschweisst si worde. Dr Moser het unger angerem o d «Indurain-Gable» fürs Banesto Team u e Miguel Indurain agfertiget. Ds Geschäft existiert immer no unger em Name Moser Radsport a dr Rehagstrasse 15 in Bümpliz.